Hag 1 | NdeIBE | STEP | Ngomnyaka wesibili wenkosi uDariyu, ngosuku lokuqala lwenyanga yesithupha, ilizwi likaJehova lafika ngomphrofethi uHagayi lisiya kuZerubhabheli, indodana kaSheyalithiyeli, umbusi wakoJuda, lakuJoshuwa, indodana kaJehozadaki, umphristi omkhulu:

Haggai 1

Isikhuthazo Sokuba Kwakhiwe Indlu KaJehova

1 Ngomnyaka wesibili wenkosi uDariyu, ngosuku lokuqala lwenyanga yesithupha, ilizwi likaJehova lafika ngomphrofethi uHagayi lisiya kuZerubhabheli, indodana kaSheyalithiyeli, umbusi wakoJuda, lakuJoshuwa, indodana kaJehozadaki, umphristi omkhulu:

2 Nanku okutshiwo nguJehova, uSomandla: “Abantu laba bathi, ‘Isikhathi sokwakha indlu kaJehova kasikafiki.’ ”

3 Ngakho ilizwi likaJehova lafika ngomphrofethi uHagayi lisithi: 4 “Kuyisikhathi senu lina ngokwenu ukuba lihlale ezindlini zenu ezinhle, kodwa indlu le ilokhu ilunxiwa na?”

5 Khathesi nanku okutshiwo nguJehova uSomandla: “Cabangani kuhle ngezindlela zenu.

6 Lihlanyele okunengi kodwa livuna okulutshwana. Liyadla, kodwa kalisuthi. Liyanatha, kodwa kalikholwa. Liyagqoka izigqoko, kodwa kalikhudumali. Lihola imiholo liyifake esikhwameni esilembobo.”

7 Nanku okutshiwo nguJehova uSomandla: “Cabangani kuhle ngezindlela zenu. 8 Khwelani ezintabeni lehlise izigodo lakhe indlu ukuze ngithokoze ngayo njalo ngidunyiswe,” kutsho uJehova. 9 “Kade lilindele okunengi, kodwa khangelani, kusuke kwaba yingcosana. Elikulethe ekhaya, mina ngikuphephulele khatshana. Kungani na?” kutsho uJehova uSomandla. “Kungenxa yendlu yami elokhu ilunxiwa, ngesikhathi lina, omunye lomunye wenu, ebambeke ngendlu yakhe. 10 Ngakho-ke, ngenxa yenu amazulu asegodle amazolo lomhlaba, amabele. 11 Ngilethe ukoma emasimini lasezintabeni, emabeleni, kuwayini elitsha, emafutheni lakukho konke okuvela emhlabathini, ebantwini lasenkomeni kanye lasemsebenzini wezandla zenu.”

12 Lapho-ke uZerubhabheli, indodana kaSheyalithiyeli, loJoshuwa, indodana kaJehozadaki, umphristi omkhulu lensalela yonke yabantu balilalela ilizwi likaJehova uNkulunkulu wabo kanye lombiko kaHagayi umphrofethi ngoba wayethunywe nguJehova uNkulunkulu wabo. Abantu bamesaba uJehova.

13 Emva kwalokho, uHagayi isithunywa sikaJehova, wanika abantu ilizwi likaJehova leli: “Ngilani,” kutsho uJehova. 14 Ngakho uJehova waqubula umoya kaZerubhabheli indodana kaSheyalithiyeli, umbusi wakoJuda, lomoya kaJoshuwa indodana kaJehozadaki, umphristi omkhulu, lomoya wensalela yabantu. Beza baqalisa ukusebenza endlini kaJehova uSomandla uNkulunkulu wabo, 15 ngosuku lwamatshumi amabili lane lwenyanga yesithupha ngomnyaka wesibili wenkosi uDariyu.